اللـــعبــة

ملحوظة ، الكتابة بهذا الشكل وبهذه اللغة متعمدة

بمناسبة العيد  الأضحي المبارك ،والأجازة الطويلة ، وكل سنة وانتوا جميعًا طيبين ؛ قررت ألعب  معاكم لعبة وأتمني تعجبكم ، بس طبعًا قبل ما نلعب هنفتح الورقة اللي بتمثل دليل اللعبة ،عشان نعرف منها شروط اللعبة ، وقواعد اللعبة ، وياسلام لو اللعبة ليها حدوتة ..

اسم اللعبة : اللا إله
شروط اللعبة :

- ما تحسبش الزمن "لاتحسب الزمن "، وماتفكرش فيه "لاتفكر فيه "، وياريت تنسي انت عايش ف أنه زمن أصلا" انسي الألفية الثانية والثالثة والرابعة "  .

- وسع دماغك وماتضيقهاش .. بمعني أدق وسع صدرك حبتين .

- خليك فاكر إني بلعب اللعبة دي معاك يعني أنا وأنت  في نفس الفريق "صديق ولست عدو " .

مكان اللعبة :

كوكب الأرض بأكمله .

الزمن اللازم للعب :

منذ بداية الخلق وحتي يمل اللاعبون  أو تنفذ بطارية روحهم  .

عدد اللاعبين :

صدقني وإحنا بنلعب هتكتشف إن العالم كله بيلعب نفس اللعبة ،في نفس الوقت .

حكاية اللعبة :

بعد أن خلق الله آدم ،وهبط هو وزوجته اللي ما حدش أكد إن اسمها حواء للأرض ، واتقابلوا علي جبل عرفات ،وخلفوا ،الذرية بدأت المشاعر الإنسانية في الإختلاف ، وظهر البغض والكره والحقد ،و"القتل " ، وبسرعة بسرعة عشان ما تزهقش من الحدوتة ،بدأت النفس البشرية تلم كل الصفات الذميمة ،وتكتنزها ، بس كانت أهم صفة في النفس البشرية "الجبن " ، وهو الصفة اللي فضلت مسيطرة علي كل الناس ،وهتفضل مسيطرة إلي قيام الساعة ، "الجبن" هو اللي خلي الناس تآمن بـفرعون ،وتنصبه إله ،وطبعا هو نفس السبب اللي خلاه يقول "أنا ربكم الأعلي "، وبعد كده كان في عصور آخري مينا ،الذي وصفه الناس بموحد القطرين برغم إنهم عارفين وشايفين الحقيقة بعنيهم ،مش لأي سبب أكتر من "الجبن" لأنه كان يملك القوة وهما دايما محتاجين اللي يحميهم .

وبعد سنين طويلة بدأت الشعوب والناس تفكر هما إزاي بيتحاموا ف واحد وبيعملوا منه إله برغم انهم كمجموع أقوي منه ، وطبعا ده

ما كانش فكر الأذكياء فقط من  أبناء الشعوب؛ ده كمان كان تفكير الملوك ، وساعتها كان "الدين" بدأ ياخد سطوة في قلوب وعقول الشعوب ، فبدأ الملوك يدوروا علي طريقة يشغلوا بيها الناس عن الملك والسياسة ، وحتي اللي يدخل من الشعوب دي في السياسة يبقي تايه و"الجبن " الديني ، والخوف من ربنا هو اللي يكون مسيطر ، وبدأ الوعاظ يقولوا أقوال من عينة " الفقراء يدخلون الجنة " حتي لا يطمع أبناء الشعب في تكوين ثروات ، وفي أوقات آخري " ما لله لله وما لقيصر لقيصر "  اللي فيه ناس بتقولها مال الله  لله ومال قيصر لقيصر  -عامة الإتنين صح-  وده طبعا عشان ما تبصش ف حاجة غيرك ، وانت أكيد فاهمني .

شوية سنين مش كتير بدأت الشعوب تتكاثر وتطلع جيل جديد بيفهم الجيل ده كان فيه، وكان عنده وجهة نظر إن العلم يقدر يعمل معجزات ، ودي فترة كده سماها الناس المثقفين -  بعيد عني وعنكم الثقافة واللي بيجي منها - بالعصور الوسطي ،ودي طبعًا كانت في الدول الأوربية ، وبدأ الجيل ده يكوّن وجهات نظر غير اللي كان بيتبناها الملوك واللي كانوا طبعا متكأين علي الوعاظ الدينين أو بمعني أدق " ساندين علي الكنيسة " ،وبالنسبة للملوك ورجال الدين شوية العيال الصغيرة دي هتضيع كل حاجة من ايديهم ، وبدأت الحرب علي العلم -اللي كان لسه بيبدأ ينتشر -عن طريق الدين ، وبدأوا يتهموا الشباب دي بالهرطقة والزندقة والإلحاد ،ومناهضة تعاليم الدين المسيحي ودي كانت مرحلة متطورة من تسيس الدين واللي استقر عليها الأفذاذ حتي الآن ،وقتلوا اللي قتلوه وحرقوا اللي حرقوه ، وهرب منهم اللي هرب ، وسموا الفترة دي بعصر المذابح الكنسية ، وعشان الكنيسة تسترد هيبتها وسيطرتها والملك يسترد عرشه الإلهي  بدأوا في تدشين حملة – مش تمرد – حملة صكوك الغفران – وكان ساعتها التسعيرة تقريبا بجوز جنيهات تبل رجلك في الكوثر وتتجوز 2 حور عين ، والاقامة فطار وعشا بس ، وكل واحد حسب طاقته وفلوسه .

الدنيا بتتقدم أكتر ، والعرب اتعودوا علي إن كل واحد يحكمهم يبقي إله ، ولولا إن دينهم حرم الأصنام كانوا عبدوهم بجد ، إنما هما بيعملوا لهم الأصنام ويحطوها في متاحف ، والغريب انهم لما بيموتوا بيبدأوا يقولوا ده كان بيعمل كذا وبيعمل كذا ، "ويقطعوا ف فروة الراجل يعيني " .

طريقة اللعب :

مطلوب تمسك ورقة وقلم ، وتكتب "بينك وبين نفسك انت وربنا " صنعت كام إله ف حياتك ، مجدت مين قوي للدرجة دي ، واستافدت منه ايه ، وتقعد تتفرج ع التليفزيون ، أي قناه إخبارية ،وحكم عقل الإنسان اللي جواك ، مش عقل الشخص المقاد من أي طرف من الأطراف ، افصل نفسك عن كل الأطراف ... واحكم علي نفسك

* لو فقت يبقي اللعبة خلصت .

*لو لسه شايف إن فيه حد يستاهل غير نفسك وبلدك "بس " ، - دينك ده بينك وبين ربنا وماتمثلش – يبقي تعيش ف العصور الوسطي ، تعيش ف 1954 تعيش النهارده ، تعيش بعد 200 سنة مش هتفرق كتير بس اظبط الغمامة اللي مغمية عينيك كويس .

سلام عليكم ,,,

Sayed basheer